Départementales en Corse-du-Sud : comment François Casasoprana les perçoit-il ?
(A redazzioni d'Alta Frequenza) - Ssu luni à 4 ori era a data limita pà pona i candidaturi pà i dipartimintali. In Corsica Suprana, fin'è l'ultimi minuti, i candidaturi sò stati numarosi pà ghjunghja fin'è 51 duetti omu è donna inde i quindeci cantoni di u dipartimentu. A situazioni hè appena diffarenti in Corsica Suttana par via di u numaru menu impurtanti di cantoni di sicuru, 11 solu, è dinò di l'ingaghjamentu menu forti di i sfarenti forzi pulitichi. 31 duetti omu è donna ani postu a so candidatura pà ss'alizzioni chì sarà urganizata ramintemula u 22 è u 29 di marzu chì venini. Pà i cantoni aiaccini, si ritrova senza surpresa maiò i candidati à quali si pinsava, è par asempiu quilli chì calchì ghjornu fà ani animatu a campagna di l'alizzioni municipali. Sarà dunqua intarissanti di suvità, aldilà di ssa simplici alizzioni dipartimintali, com'elli sò stati ridistribuiti i carti à u nivellu puliticu ind'a cità mentri chì una maghjurità assai forti s'hè stallata in casa cumuna d'Aiacciu. Stéphane Vannucci sarà bè candidatu in cumpagnia di Marie Zuccarelli ind'u cantonu d'Aiacciu II chì sarà appena com'è un usservatoriu. Sarà uppostu in fatti à François Casasoprana accumpagnatu da Marie Josée Joly, chì erani tramindui nant'à una lista cumuna à l'uccasioni di a municipali ramintemula. A manca prisintarà una terza candidatura in ssu cantonu, cù Jacques Casamarta, militanti è sindicalistu di manca ben cunnisciutu à fiancu à Patrica Curcio. Comu François Casasoprana vedi ss'alizzioni cusì particulari ?
U stemi à senta.
