Départementales en Haute-Corse : le point sur les binômes

(A redazzioni d'Alta Frequenza) - Dopu à u numaru di duetti pà l'alizzioni dipartimintali in Corsica Suprana, vali à dì 51, a so cumpusizioni. I cantoni di Bastia venini à cunfirmà una duplicazioni di ciò chì s'hè pussutu veda à i municipali in tarmini d'unioni, postu chì i duetti chì adunisci un candidatu ghjunghjendu da a famighja simeonista è un antru di a manca o di a diritta di a maghjurità bastiaccia sò stati furmati, Jean Louis Milani, par asempiu, essendu assuciatu à Anne Avenoso ind'u cantonu di Bastia II induva Ange Rovere sorti da a so ritirata pulitica pà u Partitu Cumunistu, u terzu duettu essendu custituitu da Eric Simoni è Léa Stagnara pà Corsica Libera. Dinò, u Front National, chì ùn era micca prisenti pà a municipali di Bastia, sarà raprisintatu inde trè di i quattru cantoni. U cantonu di Bastia IV vedi pà contu soiu a candidatura pà Corsica Libera di un nomu cunnisciutu in Corsica sana, quillu di Jojo Bonavita, cuurdinatori spurtivu di u Sporting Club di Bastia. In Castagniccia, Marc Antoine Nicolai è Emilie Albertini Franceschi, soli in corsa, sò, fora di una participazioni chì ùn bastaria micca, dighjà sicuri d'entra in u cunsighju generali. U cantonu d'Isula Rossa sarà u teatru di un scontru trà dui candidati in postu, Hyacinthe Mattei, chì t'avarà u sustegnu di u Partitu Sucialistu, è Pierre Marie Mancini, sustinutu da a maghjurità dipartimintali attuali. Ind'u cantonu di u Golu-Merusaglia, sò trè eletti in postu chì pruvarani à buscassi una piazza, postu chì Jean Marie Vecchioni, candidatu di manca, Jacques Costa, pà u PRG, è Jean Baptiste Castellani, pà l'UMP, sarani candidati, François Sargentini è Josepha Geronimi essendu l'ultimu duettu pà Corsica Libera. In Capicorsu, com'è privistu, François Orlandi è Jacky Padovani si scuntrarani, cù Michel Stefani pà u Front de Gauche è Sébastien Quenot pà Corsica Libera in arbitri. In u cantonu di Casinca, Yanncik Castelli pighja a seguita di u so babbu, Joseph. Si rimarca chì ancu s'è certi di quissi quì sò suppleenti, Battì Raffalli, Jean Jacques Vendasi, Eric Calloni, Ange Pierre Vivoni, Henri Zuccarelli, Paul Peraldi è Ange Fraticelli, frà altri, si ritirani di a scena dipartimintali.