Départementales : une lueur d'espoir pour la gauche dans la Cité impériale pour David Frau

(A redazzioni d'Alta Frequenza) - Cosa firmarà di ss'alizzioni dipartimintali da quì à calchì ghjornu, dopu à l'alizzioni nova di Jean Jacques Panunzi com'è presidenti di u dipartimentu di Corsica Suttana è di François Orlandi in Corsica Suprana ? Ci sarà una risposta à ssa dumanda nanzi à a fin di l'annu cù l'alizzioni tarrituriali, "i veri" chì cuncernani solu a Corsica. Nisun cunsiderazioni naziunali in fatti à l'uccasioni di quissi quì è a campagna eletturali sarà solu cuncintrata annant'à ciò ch'ella sarà a Corsica com'ella a difinisciarà a futura Assemblea di Corsica. Ss'alizzioni dipartimintali ani mustratu ciò chì hà da accada nanzi à a fin di l'annu ? Ùn c'hè nulla di menu sicuru. In tutti i casi, ci sò stati tindenzi forti duranti quissi quì, in Corsica Suttana par asempiu, è in Aiacciu in particulari, induva a diritta, fora di una tempurisazioni in un cantonu solu par raghjoni "tennichi", hà rinfurzatu a so suprana. A manca aiaccina hà cunnisciutu dipoi calchì annu disfatti eletturali à a fila. Hà principiatu cù a disfatta di Simon Renucci à l'alizzioni legislativa in Corsica Suttana, è tuttu u restu s'hè fattu da par ellu. Una volta chì a municipali hè stata persa, paria sicura chì a manca ùn pudaria micca risista à a cullata di a diritta è u risultatu d'arimani n'hè a prova a più putenti. Una manca in pezzi è acciaccata, eccu ciò ch'ellu ferma di un currenti suciali demucratu chì hà duminatu una parti impurtanti di u dipartimentu duranti una bella dicennia. Eti intesu ind'i nostri nutiziali scorsi à François Casasoprana dicci l'amarezza è tuttu ciò ch'ellu risenti di pessimu par via di ssu veru fiascu. Eppuru à manca, candidaturi ch'è no pudariami qualificà "d'alternativi" ani dimustratu ch'ella ci pudaria essa à l'avvena una ricustruzzioni. Discorsu assai vicinu di Jacques Casamarta (veda altrò) pà David Frau, inde l'altru cantonu, u terzu; par ellu, ss'alizzioni ùn hè micca stata cusì famosa, ma in tutti i casi, hà mustratu chì ci pudia essa una spera pà a manca.

Steti à senta à David Frau, pà A Manca Alternativa/Fronti di Manca.