Dépenses de personnel de la municipalité de Bastia : la réponse de Gilles Simeoni
(A redazzioni d'Alta Frequenza) - S'è no semi bè à a fin di lugliu, u prugramma di u cunsighju municipali di Bastia ùn era micca di staghjoni ssu marti, parch'ellu era guasgi carcu com'è di regula, trà a validazioni di parechji suvvenzioni o i quistioni di i custruzzioni urbani. Ma l'unicu sughjettu chì hà fattu nascia daveru un dibattitu prulungatu è putenti trà maghjurità è uppusizioni hà cuncirnatu u bughjettu mudificativu di a cità di Bastia. À mezu à i novi spesi scritti nentru à u bughjettu, 727 055 auri di spesi liati à u parsunali. D'appressu à l'aghjuntu in carica di i finanzi, Jean Joseph Massoni, ssi spesi currispondini pà a maiò parti à spesi chì pudiani essa privisti ma micca bughjettizati da l'anziana maghjurità, par asempiu cuncirnendu u parsunali in più ingaghjatu pà l'alizzioni, i vacatarii o ori in più, appena di più cà 100 000 auri essendu stati cunsacrati à a criazioni di trè posti pà funzioni novi in appiecazioni di u prugramma di a nova municipalità è à l'impiecu di un novu direttori ginirali di i servzii è di u so aghjuntu. Sò ssi dui impieghi chì ani fattu nascia u dibattitu, Jean Zuccarelli stimendu ch'elli ùn erani micca ubligati, ma ch'elli erani piuttostu liati à una scelta pulitica.
Pà Gilles Simeoni, c'era bè un'ubligazioni d'occupà ssi dui posti par asempiu par via di l'arrestu malatia di u direttori ginirali di i servizii di l'anziana municipalità, inde circustanzi curiosi sicondu u merri di Bastia, ch'è no stemi à senta.
