Divorce consommé entre François Tatti et la majorité municipale bastiaise !
(A redazzioni d'Alta Frequenza) - Quandi a tarra movi, dopu à l'alizzioni dipartimintali in Bastia ! In un cumunicatu, Gilles Simeoni, u merri, è i so aghjunti Jean Louis Milani è Emmanuelle de Gentili cunsidareghjani chì l'atti di François Tatti "sprimani a so vulintà di scludasi di fattu da a maghjurità municipali". Ci voli à capiscia quì chì u so passaghju pà i stabilimenti di u cunsighju generali ssa dumenica pà fistighjà a vittoria di François Orlandi è di a maghjurità dipartimintali hè statu l'evenimentu di u troppu, luntanu da a trasparenza missa in avanti l'annu scorsu è quist'annu ind'i sfarenti campagni eletturali. I trè cumpagni pulitichi accertani chì "ss'esigenza faci ch'ellu ci voli à dinunzià di una manera chjara i pratichi è i svianzi chì caratterizeghjani u funzinamentu di u Cunsighju Generali di Corsica Suprana dipoi tanti è tanti anni". U cumunicatu dinunzia "a scelta di François Tatti d'andà à u Cunsighju Generali di Corsica Suprana, a sirata stessa di l'alizzioni, pà fistighjà a vittoria di l'anziana maghjurità dipartimintali, senza falla sapè, nè mancu avè cunsultatu i so partinarii di a maghjurità municipali". Ssu cumunicatu amenta dinò "altri iniziativi chì ani fattu ch'elli sò stati surpresi da fatti dighjà rializati", ciò chì custituisci "un fallimentu veru à u cuntrattu passatu trà di noi è davanti à l'alittori di marzu di u 2014 è di marzu di u 2015." Una riunioni sarà urganizata dumani trà i membri di a maghjurità municipali pà pudè pighjà dicisioni, ma pari guasgi sicura oramai chì François Tatti sarà sclusu di una maghjurità chì avarà tinutu solu un annu ind'a so forma prima.
