Dix ans pour les éditions À Fior di Carta
(A redazzioni d'Alta Frequenza) - Dopu à Pigna, Albu, Ghisoni, Luri è Bastia, u Fronti Literariu Nomadu di Corsica si spiazzarà in Aiacciu. Sarà in u Bistrot du Cours, u sabbatu u 3 di dicembri à partasi da 4 ori. Hà da cilibrà torna i 10 anni di literatura rurali di l'edizioni À Fior di Carta. In un prima tempu di a ceremonia, Jean Pierre Santini farà un bilanciu in furia di un aventura di guasgi centu tituli stampati, prima di lacà l'ultimi autori publicati prisintassi è dedicà i so nuvità. In un sicondu tempu, u publicu sarà invitatu à scriva mentri un attellu apartu à tutti. Ognunu pudarà participà à un eserciziu di literatura in gruppu urganizatu chì sbuccarà nant'à un'opara cullittiva. Sarà publicata quandu i testi aduniti ghjunghjarani fin'è u mumentu di crià una bella opara di libraria. I cuntribuzioni ùn sarani micca signati, ma i paghjini di guardia di ssu prughjettu sò dighjà riservati, pronti à accoglia a lista sana di i cuntributori. U cuncorsu di l'Aiaccini à i cuntribuzioni ricenti di i Bastiacci duvaria inghjinnà un puntu dicisivu pà ssu work in progress ver di a so publicazioni. Altri stondi simuli sò privisti, postu chì saria un piccatu in u quadru di ssu prughjettu quì di lacà lochi da cantu nant'à u tarritoriu literariu di a Corsica.
Sur le même sujet
