Dossier de la municipale d'Ajaccio devant le TA de Bastia: réaction de l'avocate de Simon Renucci
(A redazzioni d'Alta Frequenza) - C'era l'asamini ssu ghjovi da u tribunali amministrativu di Bastia di u cartulari di l'alizzioni municipali d'Aiacciu. Un'audienza chì s'hè aparta da i dumandi di u rapurtadori publicu, Hugues Alladio. Quissu quì, chì hà ricusatu i rimprovari annant'à u fattu d'avè uttenutu prucurazioni grazia à minacci o prissioni è quillu annant'à l'attribuzioni di boni di succorsi grazia à u cunsighju generali di Corsica Suttana, n'hà ritinutu dui altri. Prima, u rapurtadori publicu hè vultatu annant'à i listi di l'alittori. In fatti, d'appressu à ellu, dubbiti impurtanti è ghjustificati poni essa ritinuti cuncirnendu 86 firmaturi ind'i scagni 22 fin'è 30 di a cità d'Aiacciu chì sariani assai sfarenti senza ghjustificazioni da un ghjiru à l'altru. Cuncirnendu i prucurazioni, 218 sò stati cunsidarati com'è irregulari sicondu u rapurtadori publicu, ch'ellu si trattesi di prublemi di firmaturi, o di prucurazioni numarosi cù una scrittura chì s'assumigliaria assai. Di fattu, u rapurtadori publicu, arrimbendusi à ss'elementi, hà dumandatu l'annulazioni tutali di l'alizzioni, senza chera malgradu tuttu l'ineligibilità, postu chì nisun prova ùn parmittaria tandu d'attribuiscia ss'irregularità à tali o tali candidatu. A dicisioni sarà cunnisciuta ghjovi chì veni.
Steti à senta à Claire Waquet, avucata di Simon Renucci.
