Drame de Furiani : le ministère des sports acte la sacralisation des samedi 5 mai
(A redazzioni d'Alta Frequenza) - Ssu marcuri, u Cullittivu di i Vittimi di a Catastrofa di Furiani era ricivutu da u secretariu di Statu à i Sports Thierry Braillard. Un appuntamentu impurtanti, un mesi dopu à i pruposti di ss'ultimu è a so validazioni da u cullittivu, cù a sfarenza chì hè quilla di cuntinuà a lotta pà a sacralisazioni tutali di a data di u 5 di maghju. Di fattu, in un cumunicatu, u ministru di a Cità, di a Ghjuventù è di i Sports, a FFF è a LFP accertani una sacralisazioni di u 5 di maghju quand'ellu cascarà un sabbatu, vali à dì chì nisun scontru sarà urganizatu in ssu casu quì, à u nivellu prufiziunali ma dinò amatori in Francia sana, postu chì u drama hè ricunnisciutu di manera ufficiali com'è un drama naziunali. Quandu i partiti si ghjucarani un 5 di maghju chì ùn saria micca un sabbatu, una minuta di silenziu o di sciaccamanati è sfarenti gennari d'umaghji sarani urganizati in i stadii. Una placca cumemurativa ind'i lucali di u ministeru sarà inaugurata u 5 di maghju di u 2016, è una riflessioni cumuna pà prumova ogni annu, ind'i scoli i valori di u sport grazia à azzioni specifichi duranti a sittimana di u 5 di maghju, sarà purtata cù l'Educazioni naziunali.
