DSP SNCM-CMN : le rapporteur public préconise la résiliation
(A redazzioni d'Alta Frequenza) - Ssu ghjovi, l’affari di a dilegazioni di serviziu publicu firmata da l’Uffiziu di i Trasporti di a Corsica cù a SNCM è a CMN da u 2014 à u 2023 annant’à i ligni trà a Corsica è Marseghja era à u prugramma di u Tribunali Amministrativu di Bastia. Corsica Ferries avia dumandatu in fatti l’annulazioni di ssa DSP, amintendu parechji mutivi pà dimustrà l’inugualità di trattamentu trà a cumpagnia è a SNCM è a CMN duranti a chjama di u 2013, Corsica Ferries dinunziendu una chjama tagliata à misura. U rapurtadori publicu, Hugues Alladio, hà cunclusu di fattu à a necessità di resilià a DSP attuali à u 1a d’aprili di u 2016 par via, sicondu i so cunclusioni, di a scunniscenza di i fundamenti d’ugualità nentru à l’ultima chjama. S'è a sintenza sarà cunnisciuta più tardi, ind'è a SNCM, s'aspetta quissa quì prima di parlà appena di più. Ciò chì ùn hà micca impiditu di vultà annant'à l'altru episodiu di ss'ultimi ghjorni, vali à dì a lettara di Paul Giacobbi induv'ellu faci sapè a so voglia di ùn pagà più a DSP attuali à u 31 di marzu.
Steti à senta à Olivier Diehl, u presidenti di u direttoriu di a SNCM.
