DSP sur Toulon : le triple NON de Camille de Rocca Serra
(A redazzioni d'Alta Frequenza) - Innò, innò è innò ! Iss'affirmazioni ripituta trè volti pudaria rispichjà u parè guasgi sanu di l'Assemblea di Corsica nant'à l'allarghera di u perimetru di a prossima dilegazioni di serviziu publicu nant'à Tulò, ancu s'è a paternità ni riveni à Camille de Rocca Serra. Issu famosu raportu d'infurmazioni, chì ùn era micca purtatu à u votu stamani (vennari), hà vistu una mansa di rimprovari lampati à Paulu Giacobbi è Paulu Maria Bartoli, pà avè furmulatu una pruposta chì pari ch'ella ùn cunvenissi micca à l'eletti tarrituriali. Fora di u gruppu Cumunisti è Fronti di manca, chì ci andavia à prò, erani veramenti pochi, ancu à manca, à essa d'accunsentu cù iss'allarghera di u serviziu publicu nant'à Tulò. A paura di u monopolu nant'à i ligni maritimi Corsica Cuntinenti, era più cà prisenti duranti tutti i dibattiti, è s'è tuttu ognunu hè d'accordu pà a necessità di un serviziu publicu, guasgi tutti dumandani una cuncurrenza sana è franca, chì parmittaria à a Corsica di ùn essa micca strà liata à una sola cumpagnia. Aldilà di un novu dibattitu nant'à i trasporti maritimi, riccu, è assai tennicu, a sola infurmazioni vera di a ghjurnata finalmenti hè chì a presa di dicisioni hè stata rimandata, forsa à u mesi di sittembri. L'assemblea, rammintemu la, si duvia prununzià duranti l'ultima sissioni nanzi à i vancanzi, vali à dì à a fini di u mesi di lugliu. Emi rializatu parechji intarvisti ch'è no prisintaremi ind'i nostri sfarenti nutiziali, dendu vi ogni volta dui parè cuntrarii, quilli di i gruppi di l'assemblea di Corsica, quilli di i raprisintanti di i cumpagnii maritimi ma dinò quilli di i sfarenti sindicati chì erani prisenti à l'uccasioni di issu dibattitu.
Écoutons Camille de Rocca Serra, qui a poussé avec conviction ce triple non.
Sur le même sujet
