Dur conflit à l'Office de l'Environnement de la Corse
(A redazzioni d'Alta Frequenza) - I parsunali di l'Uffiziu di l'Ambienti di a Corsica sò in greva dipoi arimani (marcuri), aduniti inghjiru à un'intersindicali STC-CGT. D'appressu à elli, un ambiu suciali assai pessimu saria prisenti ind'è l'OEC; dopu à dui preavisi di greva chì ani inghjinnatu dui protocolli d'accordu sindicali micca rispittati pà a maiò parti, a situazioni saria divintata splusiva par via di situazioni mai cunnisciuti chì sò spuntati. Una saria pessima di un puntu di vista psicologicu nant'à l'insemi di u serviziu di i risorzi umani di pettu à u cumpurtamentu micca adattatu, sicondu l'intersindicali, di u so novu rispunsevuli, ghjuntu nentru à l'intrapresa d'aostu scorsu. Un cunflittu chì i sindicati, chì dumandani chì ssa parsona si n'andessi, vulariani bè arrigulà u più prestu pussibuli, da fà chì un ambiu sirenu sighi di ritornu inde l'Uffiziu di l'Ambienti di a Corsica. U presidenti di l'Uffiziu di i Trasporti di a Corsica Petru Ghionga hà fattu sapè, dopu à a cunfarenza di stampa urganizata da l'intersindicali, ch'ellu era ditarminatu à fà sorghja a verità. Hè cusì ch'ellu hà dicisu di chjamà l'ispizzioni di u travaghju, a medicina di u travaghju ma dinò a ghjustizia pà schjariscia ss'affari. S'è i sfarenti istanzi citati più sopra li duviani dà tortu, Petru Ghionga hà annunziatu ch'ellu darà a so demissioni à Paul Giacobbi.
Steti à senta à Ghjuvan Micheli Culioli, chì faci parti di l'intersindicali STC-CGT di l'OEC.
Sur le même sujet
