Ebola en Corse : zéro cas, mais pas risque zéro
(A redazzioni d'Alta Frequenza) - C'era stamani (marcuri) una riunioni impurtanti di tutti i servizi di u Statu, è sò numarosi, annant'à a presa in contu di u risicu Ebola in Corsica. I prifitturi di l'isula, l'Agenza Righjunali di a Saluta, l'Educazioni naziunali, i servizi di securità, ancu l'armata, i SDIS, l'uspidali, i porti è aeruporti, i cumpagnii marittimi è aerei, si sò aduniti tutti pà pudè valutà i risichi d'Ebola ind'è noi è rifletta à a missa in ballu di i misuri à pighjà contr'à u risicu di ssa malatia. Hè stata ditta da tutti i participanti: si trattava bè di una riunioni "nurmali in una situazioni nurmali" ed hè assai impurtanti d'insista bè annant'à ssu puntu. In fatti, cù nisun casu custatatu, nè mancu suspittatu, a Corsica hè ind'a "nurmalità" a più tutali, ciò chì ùn voli micca dì ch'ellu ùn ci voli micca à intarissassi à ssa quistioni. Cosi simplici ma ditarminanti devini essa bè integrati da a pupulazioni in casu di suspettu: firmà sopralocu, ùn andà micca ind'è u so medicu o andà à l'uspidali, chjamà u 15.
Steti à senta à Jean Jacques Coiplet, u direttori di l'Agenza Righjunali di a Saluta.
Sur le même sujet
