Élévation au Cardinalat de Monseigneur Mamberti ce matin par le Pape François à Rome
(A redazzioni d'Alta Frequenza) - 136 anni chì a Corsica ùn avia micca cunnisciutu un evenimentu simuli. Ssu sabbatu in fin di matinata, Monsignore Dominique Mamberti, prifettu di u Tribunali supremu di a Signatura apostolica dipoi nuvembri scorsu sarà criatu Cardinali da u Papa Francescu in Roma à l'uccasioni di u cunsistoriu di ssu 14 di farraghju di u 2015. Una vera cunsecrazioni pà ss'omu di ghjesgia di 62 anni, chì sarà l'unicu francesi à mezu à i cardinali novi. Dopu essa statu urdinatu preti in u 1981 in Aiacciu, Dominique Mamberti hè intrutu ind'u serviziu diplomaticu di a Santa Sedia in u 1986. Cunsacratu vescu in u 2002, u papa li dà à ss'epica quì u titlu arcivescu di Sagone. Trà u 2002 è u 2006, sarà nunziu apostolicu in u Soudan, in Eritrea è in Sumalia. In u 2006, hè numatu secretariu pà i rilazioni cù i Stati, un postu equivalenti à quillu di ministru di l'Affari stragneri. Corsi numarosi sò partuti pà a cità eterna è cunnoscia ssu mumentu storicu. Da un'antra banda, a Cità d'Aiacciu, in partenariatu cù u viscuvatu d'Aiacciu, hà da ritrasmetta annant'à un screnu maiò in ghjesgia San Roccu u cunsistoriu di ssu ghjornu in direttu da Roma à partasi d'ondeci ori.
Sur le même sujet
