Enquête sur l'impact du nuage de Tchernobyl en Corse: les conclusions politiques du rapport
(A redazzioni d'Alta Frequenza) - Una bugia di Statu! Eccu comu pò essa qualificata a pusizioni di u Statu dopu à l'accidenti di Tchernobyl in Ucraina u 26 d'aprili di u 1986. Rammintemi chì a pulluzioni radiuattiva, chì hà toccu 15 paesi aurupei à u minimu, ùn era micca passata cù miraculu, sicondu fonti ufficiali, in Francia, è di u colpu in Corsica dinò. Omu avia irunizatu assai à l'epica, cù una risa nera aduprata à spessu quandu ci hè una situazioni gravi, nant'à u famosu nivulu di Tchernobyl chì s'hè firmatu à a fruntiera. 27 anni dopu, a verità schjatta infini, in tutti i casi s'è no cridimi a cumissioni d'inchiesta missiunata da a cullettività di Corsica pà risolva ssu misteru maiò. Dopu à una chjama à l'ufferta aurupea, una squadra di ricerca di l'uspidali Galliera in Ghjenuva hà rializatu un'inchiesta epidemiologica rettruattiva nant'à i cunsiquenzi di u nivulu radiuattivu nant'à a pupulazioni di Corsica. Prisintati arimani (ghjovi), i risultati sò quì: Iè u nivulu hà toccu di manera forti a Corsica è iè l'affari hà avutu cunsiquenzi gravi nant'à a saluta di parechji isulani. Ùn emi micca da vultà nant'à tutti i tappi scemi di ssu cartulari nant'à più di vinti anni ma calchì sciffru chjavi mettini in risaltu u carattaru sprupusitatu di a catastrofa: tiroiditi + 78 %, noduli benini + 65 %, hyper tiroidisimu + 103 %, cancari di a tiroida + 28 %. Ùn ammintaremi micca l'altri elementi di l'inchiesta, ci vultaremi largamenti, pà cunsacrà ci à l'aspettu "puliticu" di u cartulari è nant'à ssa famosa bugia di Statu urganizata com'ellu ci voli dopu à a catastrofa. Ssu cartulari, si sà, hè statu purtatu da a cumissioni Tchernobyl di l'assemblea di Corsica, cù a so presidenti Josette Risterucci, è si sà cù parechji volti voti unanimi di ss'assemblea quì. Ghjuvan Guidu Talamoni hà participatu di manera attiva à ssa cumissioni; tira tutti i cunclusioni pulitichi di ssu raportu.
Ecoutez-le.
