Européennes: Corsica Libera ne donne aucune consigne de vote à ses électeurs
(A redazzioni d'Alta Frequenza) - Corsica Libera urganizava arimani (dumenica) in Corti a so ghjunta tradiziunali, chì hà adunitu i dilegati di tutti i sizzioni di l’isula. L’urientazioni maiò chì hè stata aduttata dopu à ssa riunioni hè di sbuccà annant’à un’urganisazioni è una strutturazioni più attuali di u currenti indipendentistu pà renda lu indispinsevuli ind’a perspettiva di mumenti futuri impurtanti; ci vultaremi ind’i nostri nutiziali chì venini di manera più larga. Corsica Libera hà dinò vulsutu fà cunnoscia a so pusizioni cuncirnendu l’alizzioni aurupei di dumenica chì veni. U partitu naziunalistu faci valè parechji idei pà ciò chì tocca a piazza ch’ella devi avè a Corsica inde l’Auropa, una raprisintatività più impurtanti è una vera presa in contu di i so specificità. Corsica Libera chì batti dinò à prò di un’antra custruzzioni pà l’Auropa hà dicisu di lacà i so alittori libari di fà a so scelta, è què malgradu a prisenza di un candidatu autunumistu, François Alfonsi, numaru unu di a lista “Régions et Peuples Solidaires” è chì faci parti di Femu a Corsica, postu chì ùn c’hè micca statu accordu puliticu trà i dui cumpunenti di u muvimentu naziunali, dipoi l’ultimi municipali soprattuttu.
Steti à senta i spiecazioni di Petru Antò Tomasi, pà Corsica Libera.
