Européennes: dernière ligne droite pour François Alfonsi et Régions et Peuples Solidaires
(A redazzioni d'Alta Frequenza) - Ssu marti, a lista Régions et Peuples Solidaires hà urganizatu u so ultimu meeting di campagna in Bastia. A lista purtata da François Alfonsi hà pussutu cuntà annant'à u sustegnu di u merri di Bastia, Gilles Simeoni, prisenti à a tribuna, ma dinò di i leaders di u Rinnovu Paul Félix Benedetti è Gérard Dykstra, prisenti ind'a sala. L'uccasioni pà u diputatu aurupeu di mubilizà nanzi à l'alizzioni di u 25 di maghju. È s'ellu hè chjaru ch'ellu sarà assai difficiuli pà ssa lista di racoglia i 5% chì parmettini d'uttena un postu à u parlamentu aurupeu, s'hè insistutu annant'à l'impurtanza di u risultatu di a lista in Corsica. In fatti, d'appressu à François Alfonsi, s'è a so lista duvia rializà una bella parfurmenza inde l'isula, saria tandu un missaghju in più lampatu à u Statu, pà dimustrà chì ancu ind'u quadru di un'alizzioni chì, ed hè un sicretu pà nimu, appassiuneghja a ghjenti quant'è un scontru amichevuli di ballò, u missaghju righjunalistu, è ancu naziunalistu, t'hà una purtata di più in più putenti.
Steti à senta à François Alfonsi chì volta dinò annant'à u successu pussibuli di u Front National pà ss'alizzioni.
Sur le même sujet
