Facebook oramai in lingua corsa !
(A redazzioni d'Alta Frequenza) - S'è a cuufficialità di a lingua corsa cù u francesi ùn hè ancu ricunnisciuta da l'autorità pulitichi naziunali i più alti, l'hè da a reta suciali a più pupulari ind'u mondu. Dipoi ssu luni, hè pussibuli in fatti pà l'usadori chì a volini fà d'aduprà Facebook in lingua corsa. Hè simplici : ci voli à andà ind'i parametri generali di u so contu eppo sceglia à mezi à i parlà numarosi prisenti ind'u listinu "lingui". S'è ss'annunziu risona com'è una bella piccula rivuluzioni pà a prumuzioni di a lingua corsa à un nivellu di quilli putenti, hè impurtanti di pricisà chì a reta suciali hà apartu un spaziu di traduzzioni di i sfarenti parolli. Sò i so membri chì devini purtà ss'intrapresa andendu nant'à a paghjina Facebook Translations Team, di pichjà annant'à "J'aime", o piuttostu "Mi piace", è di suvità l'indicazioni. Par avà, l'opara di traduzzioni di Facebook in corsu hè rializata solu à 13%. Una chjama hè dunqua lampata da fà chì tuttu ognunu purtessi a so petra à ss'edifiziu par chì ss'evenimentu sighi una vera riescita.
Sur le même sujet
