Femu a Corsica pour rebâtir un dispositif de transports maritimes adapté aux besoins de l'île
(A redazzioni d'Alta Frequenza) - Pari chì a situazioni di a SNCM andessi più in furia è si pudia priveda largamenti dopu à l'intarvinzioni à l'assemblea naziunali di Paul Giacobbi è di u Secretariu di Statu à i Trasporti. A riunioni chì hè stata urganizata arisera in Marseghja in un ambienti caldu trà a cumpagnia marittima, l'azziunari è i sindicati pudaria essa cunsidarata guasgi com'è menu impurtanti di pettu à l'evuluzioni di a situazioni. In fatti, l'addirizzamentu ghjudiziariu pudaria principià à partasi di luni chì veni. Transdev pudaria dumandà à a cumpagnia u rimbursamentu di ciò ch'ella devi pà pudè inghjinnà ssa misura è l'intarvinzioni di u tribunali di cummerciu. Pà u gruppu Femu a Corsica, ciò chì si passa in ssu mumentu à a SNCM hè a fini di un prucedimentu longu. Aldilà di i tinsioni, di i grevi è di i cunsiquenzi annant'à l'ecunumia di a Corsica, fora di un prublema suciali assai difficiuli, u gruppu naziunalistu pensa ch'ellu ci voli à ricustruiscia oghji un dispusitivu di trasporti marittimi tutalmenti adattatu à i bisogni di a Corsica.
Steti à senta à Ghjuvanni Biancucci.
