Fièvre catarrhale et dotations aux agriculteurs corses: vers des avancées concrètes ?
(A redazzioni d'Alta Frequenza) - Una dilegazioni di raprisintanti di u mondu agriculu corsu hè stata ricivuta arimani (vennari) in Parighji da u ministru di l'Agricultura, Stéphane Le Foll. À u centru di i discussioni, dui temi maiò : l'indennisazioni di l'allivadori chì ani vistu i so animali tocchi da a frebba catarrhale è l'aiuti finanziarii privisti da a Pulitica Agricula Cumuna. Pà u primu cartulari, chì hà fattu di più in più parlà d'ellu ss'ultimi settimani, u ministeru prupunaria di fà ricullà in Brussels è l'alti autorità aurupei una dumanda d'indennisazioni versu 340 auri pà ogni bestia, mentri chì i raprisintanti isulani vularia un'indennità à pocu pressu di 400 auri. Pà ciò chì tocca u prublema di fà una valutazioni nova di l'aiuti dati di manera più ghjinirali à l'agricultori corsi ind'u quadru di a PAC, pari chì l'affari avanzessini quì dinò. In fatti, s'è oghji 100 000 ettari di lochi sfruttati sò ricunnisciuti, ssa superficia pudaria passà à l'avvena à 149 000 ettari o ancu di più s'è u prublema di a cunvergenza fatta subbitu è di modu sanu di l'aiuti avia da essa arrigulatu. Discussioni chì ani da cuntinuà è chì si pudariani cuncretizà da quì à pocu pà a frebba catarrhale, è à mezu andà pà quillu nant'à l'aiuti privisti da a PAC. U ministru Stéphane Le Foll pudaria vena in Corsica nanzi à a fin di l'annu.
