Fièvre catarrhale : les jeunes agriculteurs en colère
(A redazzioni d'Alta Frequenza) - Lettara aparta di Sébastien Costa, presidenti di i Ghjovani Agricultori di Corsica Suprana à u prifettu. Ssa lettara tocca l'epidemia di frebba catarrhale. Sébastien Costa intarrugheghja u raprisintanti di u Statu : hè vera chì a Corsica hè minacciata da un arrestu pà impidiscia qualsiasi spiazzamentu d'animali vivi, d'animali micca curati dipoi 60 ghjorni à u minimu ? Hè vera, chì i piccaturi sò privisti oghji è ubligatorii pà i serotipi 1, 2, 4 è 8, ma chì i piccaturi dispunibuli coprini solu dui di ssi serotipi è sò in più di què, ind'una quantità chì ùn basta mancu appena ? Hè vera infini ch'ellu hè propiu pussibuli chì ss'arrestu ci impidisci di venda i nostri agnelli vivi in Sardegna è chì s'ella fussi u casu, sariami indennizati pà lampà à caternu i nostri agnelli ? È di cuncluda cù un'ultima dumanda più putenti : pinseti ch'è vo aveti riisciutu a vostra missioni in Corsica ? Pà contu meiu, "ùn pensu micca è saria assai surpresu chì a scuntentezza ùn ghjunghjissi micca fin'è voi di manera assai paisana !" dici dinò Sébastien Costa.
