Finale de la Coupe de la Ligue : une organisation très stricte mise en place
(A redazzioni d'Alta Frequenza) - Si dici suventi chì u ballò hè una festa, ma quand'ellu si tratta di una finali di Cuppa di a Liga, l'urganizatori di a festa poni essa siveri. In fatti, a Liga di Ballò Prufiziunali è a Prifittura di Pulizza di Parighji ani impostu cundizioni assai siveri cuncirnendu ciò chì s'hà da passà ind'a parti riservata à i sustenidori di bastiacci in u stadiu di Francia pà ssa finali trà u SC Bastia è u Parighji Saint Germain. Pà a prima volta dipoi chì i finali di cuppi naziunali si ghjocani in u stadiu di Francia, LFP è prifittura di pulizza ani ricusatu à u gruppu di sustenidori Bastia 1905 a so brama d'essa in u sicondu annellu. Sarani malgradu tuttu inde ssu sicondu annellu, postu ch'elli ani rinunciatu à i so piazzi di gruppu è ch'elli ani compru piazzi di una manera individuali. Malgradu tuttu, LFP è prifittura di pulizza ani dicisu chì striscioni, ancu quilli chjuchi raprisintendu paesi o rughjoni, banderi maiò, tamburi, portavoci, è tuttu u matiriali di sustenidori fora di i banderi cù un manicu di menu di un metru pudarani entra solu ind'u primu annellu. Vali à dì chì i gruppi di sustenidori è i sustenidori cù picculi striscioni ùn li pudarani micca mustrà ind'u sicondu è in u terzu annelli. Un'attitudina dinunziata da u Sporting.
Steti à senta à Antoine Agostini, u direttori di l'urganisazioni è di a securità di u SC Bastia.
