Finances de la CAB : Francis Riolacci défend la gestion de l'équipe précédente
(A redazzioni d'Alta Frequenza) - Dopu à dui cunsighji cumunitarii di stallazioni, a Cumunità d'Agglumerazioni di Bastia hè intruta inde l'affari serii ssu marti cù l'aduzzioni à l'unanimità di i conti amministrativi 2013, ma dinò è soprattuttu cù u dibattitu d'urientazioni bughjettarii 2014 prima d'aduttà marti chì veni u bughjettu primitivu. François Tatti, u presidenti di a CAB, hà mandatu subbitu à caternu qualsiasi voglia d'ottimisimu qualifichendu a situazioni finanziaria di a CAB di propiu pessima. In fatti, pà u 2014, imprestiti impurtanti pesani annant'à i finanzi, com'è trasferimenti di carichi, dutazioni di u Statu chì calani assai o ricetti fiscali annant'à a calata dinò. Una situazioni chì si traduci da un risparmiu nigativu d'1,3 millioni d'auri ind'u previsiunali, vali à dì un'incapacità assai limitata pà investiscia. Pà tena i finanzi à l'equilibriu micca solu pà u 2014 ma pà l'annu chì veni, ss'annata ùn duvaria micca veda nascia prughjetti strutturanti novi, pà pudè cuntinuà à finanzià i prughjetti in corsu è à riescia missioni nicissarii, tuttu què aspittendu un studiu finanziariu. A pudiami priveda, a gistioni di a squadra scorsa hè stata criticata, à ssi critichi Francis Riolacci, l'anzianu monsieur finanzi di a CAB hà fattu una riposta puntu à puntu di guasgi una mez'ora.
U stemi à senta dopu à ssu cunsighju cumunitariu.
