Finances du GFC Ajaccio volley-ball : le président du club en partie rassuré par la CTC
(A redazzioni d'Alta Frequenza) - Chì mudellu ecunomicu pà u sport corsu d'altu nivellu ? Era u tema d'una ghjurnata di travaghju urganizata vennari in a Cullittività Tarrituriali di Corsica, diretta da u presidenti di l'Esecutivu, Gilles Simeoni. À ssa ghjurnata ani participatu i clubs di ballò di u SC Bastia, di l'AC Aiacciu, di u GFCA, di u CAB è di u GFC Aiacciu volleyball, ma dinò parechji cullittività publichi, fora di a CAPA è di u Cunsighju Dipartimintali di Corsica Sutttana chì ùn si sò micca spiazzati. Clubs spurtivi chì, di pettu à a calata di i mezi attribuiti da ssi stessi cullittivittà, par via di un quadru bughjettariu custrettu, devini pinsà di un'antra manera pà truvà risorzi novi chì li pudariani assicurà un avvena veru à mezu è longu andà, sempri cù azzioni à tempu à cortu andà. Una prublematica chì vali ancu di più, setti belli mesi à pocu pressu nanzi a nascita di a cullittività unica. Hè particularmenti u casu pà u GFC Aiacciu volleyball, veru portabandera di u sport corsu dipoi calchì staghjoni in Francia ma dinò in Auropa cù risultati è tituli chì facini nascia l'inviglia di tanti è tanti clubs in cuntinenti. Par via di u fattu chì i 320 000 auri privisti pà a staghjoni 2016-2017 ùn sò micca stati virsati in integralità da a CTC, u club hè statu ubligatu à piantà u so marcatu calchì ghjornu fà. A riunioni di vennari in u Grand Hôtel avaria parmissu d'arrigulà a situazioni, ciò chì hà rassicuratu in parti u presidenti di u GFCA volleyball, ancu s'è l'avvena s'annunzia più difficiuli cà privistu.
Steti à senta à Antoine Exiga.
