Football (Coupe de France) - Le CA Bastia à Vallières pour aller chercher un derby
(A redazzioni d'Alta Frequenza) - Issu dopu meziornu (sabbatu) à 4 ori à u stadiu di i Grangettes di Rumilly in Alta Savoia, u club di l'ES Vallières, chì ghjoca in settesima divisioni, hà da riceva u CA Bastia ind'u quadru di l'ottesimu ghjiru di a Cuppa di Francia, ultima tappa nanzi à i trentaduiesimi di finali. Bastiacci chì, di pettu à u so statutu di club di Naziunali, vali à dì a terza divisioni, sò i favuriti logichi di u scontru. Ma ognunu a sà, in Cuppa di Francia, tuttu pò accada è ci vularà à essa propiu attenti pà buscà si a ricumpensa dopu à issa partita. Una bellissima ricumpensa, postu ch'ella parmittaria à u CAB di riceva u Sporting Club di Bastia in trentaduiesimi pà un derby bastiacciu scarsu scarsu à issu mumentu di a cumpetizioni in Cuppa di Francia.
