Football (Coupe de France) - Le SC Bastia revient de Paris avec une valise (7-0)
(A redazzioni d'Alta Frequenza) - Hè solu una partita di trentaduiesimi di finali di a Cuppa di Francia, soprattuttu contr'à u Parighji Saint Germain, ma perdasi 7-0 ùn hè micca banali pà un SC Bastia chì hè soca firmatu in vacanzi. Dopu avè risistutu una mez'ora, i bastiacci ani cappiatu in difesa à più pudè. Di manera successiva, Thiago Silva à a 30esima minuta, Rabiot à a 34esima, Nkunku à a 48esima, Motta à a 57esima, Lucas à a 63esima nant'à un penalty, Di Maria à a 77esima è Draxler à l'89esima ani punitu una squadra bastiaccia cù una difesa chì hà fattu parechji errori maiò. François Ciccolini è i so ghjucadori t'ani assai travaghju par appruntà u viaghju in Nancy sabbatu, impurtantissimu in a corsa à u mantenimentu.
