Football (Coupe de la Ligue) - Le SC Bastia à Monaco pour ramener la finale
(A redazzioni d'Alta Frequenza) - Invasione Turchina. Dui parolli più cà chjari chì rispechjani dipoi a dumenicata scorsa ciò ch’elli pensani di fà i sustenidori di u SC Bastia pà a meza finali di a Cuppa di a Liga stasera (marcuri) à 9 ori annant’à u tarrenu di l’AS Monacu. In fatti, guasgi 3 000 sustenidori bastiacci sarani prisenti in u stadiu Louis II, a mità fendu u spiazzamentu da Corsica sana in un battellu spiciali o in avviò. Ci voli à dì chì l’inghjocu hè assai maiò, parchì s’ellu si qualificheghja, u Sporting cunnosciarà a so prima finali di una cuppa naziunali dipoi tredeci anni è a Cuppa di Francia in u 2002 persa in u Stadiu di Francia contr’à Lorient, è a so prima finali di Cuppa di a Liga dipoi vint’anni è una finali persa 2-0 in u Parc des Princes contr’à u Parighji Saint Germain, chì saria u so avversariu l’11 d’aprili chì veni. Pà fà chì a storia ùn si ripitessi micca, i ghjucadori bastiacci duvarani rializà a scumessa di fà cascà, dopu à 90 minuti, à i prulungazioni o ancu à i penalties una squadra di Monacu chì ferma nant’à tredeci partiti senza disfatta è una sola reta incasciata. A sfida duvaria essa assai difficiuli, ma l’intrenori bastiacciu credi ind’i so omi, soprattuttu chì Gaël Danic è Giovanni Sio, i dui ghjucadori novi i più impurtanti di u marcatu, sarani titulari, è chì u capitanu bastiacciu Cahuzac sarà di ritornu di suspensioni.
Steti à senta à Ghislain Printant, l'intrenori di u SC Bastia.
