Football - Le SC Bastia finit sa préparation en fanfare en battant l'Udinese (3-2)
(A redazzioni d'Alta Frequenza) - Prumetti. Eccu ciò ch'ellu si pò dì di l'ultima partita amichevuli di priparazioni di u SC Bastia chì hà vistu i Bastiacci batta a squadra di l'Udinese in Italia 3-2. Un risultatu chì hè statu di 3-0 duranti un tempu longu, postu chì à partasi di a cinquesima minuta, Brandao avia scrittu a prima rialisazioni, suvitatu deci minuti dopu da Ayité. Assai in forma davanti grazia à a vitezza di u triangulu Ayité-Diallo-Kamano daretu à Brandao, i Bastiacci ani allargatu u so successu grazia à Kamano à a mez'ora di ghjocu, ellu chì hà fattu passi dicisivi pà i dui primi reti. Dopu, u Sporting hà tinutu senza troppu prublemi, è Ghislain Printant hà fattu ghjirà u so effettivu appena dopu à l'ora di ghjocu. Hè solu à a fin di a partita chì Aguirre hà rializatu un duppiettu pà l'Udinese. Una bella pristazioni chì dà veri mutivi di suddisfazioni aspittendu sabbatu chì veni è a partita contr'à Rennes pà a ripresa di a Liga 1 in Furiani.
