Football (Ligue 1) - Clap de fin pour le SC Bastia à Marseille
(A redazzioni d'Alta Frequenza) - Ssu sabbatu à 9 ori pà l'ultima ghjurnata di Liga 1, u SC Bastia, ondicesimu, và annant'à u tarrenu di l'Olympique di Marseghja, quattriesimu. Ssu scontru s'assumiglia à un'ultima tranquilla nanzi à a fini di u campiunatu, postu chì u Sporting hà assicuratu infini u so mantenimentu com'è sempri à listessa epica è ch'ellu hè guasgi sicuru di finiscia à u tredicesimu postu à u minimu, pocu impremi u risultatu. Ancu s'ellu hè impurtanti ben intesu, l'inghjocu finanziariu pà u club in casu di bon risultatu ùn pò essa più forti cà quillu di l'OM, chì si pò qualificà pà u ghjiru preliminariu di a Liga di i Campioni s'ellu vinci contr'à u Sporting. È di pettu à a staghjoni difficiuli vissuta da i ghjucadori di Ghislain Printant, a sittimana d'intrenamentu ùn hè micca stata, di logica, assai intensa. Malgradu tuttu, si trova a vulintà di fà bona figura duranti una partita induva i bastiacci sarani privi di Cahuzac, suspesu, è di Modesto, assenti, à mezu ad altri, è di i so sustenidori, pruibiti torna una volta di spiazzamentu.
Steti à senta à Ghislain Printant, l'intrenori di u Sporting.
Sur le même sujet
