Football (Ligue 1) - Défaite à handicaps pour le SC Bastia à Saint-Etienne (2-1)
(A redazzioni d'Alta Frequenza) - I brutti lingui diciarani chì u dodicesimu omu di Saint Etienne ùn era micca ind'i tribuni pà una volta, ma annant'à u tarrenu cù una zifulella in bocca dopu a disfatta 2-1 di u SC Bastia in Saint Etienne. Ci voli à dì chì l'arbitru di u scontru, Anthony Gautier, era propiu in forma pà ssa dumenica assulanata surtendu dopu à trè minuti una carta rossa mancu appena ghjustificata contr'à u bastiacciu Djiku pà un colpu micca gattivu ma piuttostu strampalatu. Ghjucà una partita à deci contr'à ondeci ùn hè mai un rigalu, soprattuttu contr'à una squadra di u nivellu di Saint Etienne. Ma i fatti di l'arbitru ùn erani micca compii, postu chì à a vintesima minuta, annant'à un corner imaghjinariu, Perrin hà scrittu una rialisazioni dopu à un sgaghjamentu mancatu da Palmieri. In difficultà in un prima tempu, i bastiacci sò spuntati dopu, è à rombu di pruvà à parta in contru, Danic, apprufittendu di una bella azzioni è di un sbagliu di i lucali, battia à Ruffier à a 41ima. Dopu à a pausa, Saint Etienne mittia di più in più a prissioni annant'à u Sporting, è appena dopu à l'ora di ghjocu, Eysseric, cù un tiru di 20 metri, hà battutu à Hansen micca troppu bè piazzatu. È deci minuti dopu, à a 72ima, Anthony Gautier cumpiia u so spittaculu cù a sclusioni di Kamano chì hà pichajtu senza falla apposta contr'à Ruffier sculiscendu, l'arbitru surtendu ancu a so carta rossa prima di chjamà i medichi, postu chì Kamano s'hè feritu duranti l'azzioni. Dopu à ssa partita, u Sporting hè siesimu è t'hà cinqui punti di più di pettu à a zona rossa.
Steti à senta à Ghislain Printant, l'intrenori bastiacciu.
Sur le même sujet
