Football (Ligue 1) - Défaite logique du SC Bastia à Marseille suite à un match mouvementé (0-3)
(A redazzioni d'Alta Frequenza) - Ùn c'hè micca stata surpresa pà ss'ultima partita di a staghjoni di Liga 1, induva u SC Bastia, dighjà u capu in altrò, hà persu 3-0 in Marseghja pà quali a vittoria sarà stata inutuli ind'a so corsa à a Liga di i Campioni. Guasgi mai periculosi, i ghjucadori di Ghislain Printant avarani pruvatu à cuntrà soprattuttu l'assalti di i lucali, u successu marsighjesu cumpunendusi in trè parti. A prima, à a 13ima minuta, quandu Payet s'hè infrugnatu in a difesa bastiaccia dopu à una corsa scema, prima di batta à Leca. A siconda hè stata una sfurtuna pà Djiku, chì quand'ellu hà pruvatu à rimandà un tiru di Morel hà battutu infini u so guardianu. Infini, a terza hè stata missa in scena da Ocampos, chì hà presu di cortu a difesa bastiaccia prima di tirà un ballò sopr'à Leca à l'88ima minuta. Di più cà a partita stessa, sò l'ughjetti è i fulgani lampati senza piantà da i tribuni marsighjesi contr'à Jean Louis Leca chì ci voli à ritena. Duranti tuttu u prima tempu, l'affari hè statu cuntinuu, un fulganu fendu ancu cascà in tarra u guardianu bastiacciu, i dilegati di a LFP è l'arbitri lachendu guasgi corra l'affari. Ci sarà vulsutu à veda altri ughjetti è fulgani lampati nanzi à u principiu di u sicondu tempu pà chì u scontru sighi piantatu un quartu d'ora, dopu a dicisioni di Ghislain Printant di fà vultà i so ghjucadori ind'i spugliatoghji. Un lascià corra stranu, quandu si sà chì l'istanzi dani un'impurtanza sprupusitata guasgi senza arrestu u minimu muvimentu di i sustenidori bastiacci. U Sporting, pà contu soiu, compii una staghjoni chì era principiata assai mali cù 47 punti infini è un dodicesimu postu à a classifica.
