Football (Ligue 1) - Et si Guillaume Gillet revenait au SC Bastia ?
(A redazzioni d'Alta Frequenza) - Hè tuttu u paradossu di a situazioni attuali di u Sporting Club di Bastia. Mentri chì a DNCG ùn hà micca autorizatu par avà u SC Bastia à ghjucà in Liga 1, a vendita di Ryad Boudebouz, quand'ella sarà presa in contu da a cumissioni d'appellu di a DNCG, pudaria parmetta à u Sporting d'avè appena di più cà l'autorisazioni di ghjucà in Liga 1 a staghjoni chì veni. In fatti, s'è u trasferimentu di Boudebouz duvia bastà pà mantena u Sporting in Liga 1 è autorizallu à pighjà ghjucadori cù indennità di trasferimentu pà truvà un accordu cù u club belgu d'Anderlecht, u belgu Guillaume Gillet pudaria vultà. Quillu chì hà fattu maravighji ind'u mezu di tarrenu bastiacciu a staghjoni scorsa hà ricivutu eppuru un'ufferta superiori di u Stade de Reims, chì hà dighjà trovu un accordu cù i dirighjenti belghi. Ma u diavuli rossu s'hè attaccatu assai à u Sporting, à tal puntu ch'ellu hà dumandatu tempu in più pà rifletta à i dirighjenti di Reims, una manera di tempurizà inde ssu cartulari cumplessu. In fatti, s'è Guillaume Gillet hà bè ricivutu l'ufferta di Reims, quissu quì voli pruvà tuttu pà firmà in un club è in una Corsica chì sò in u so cori. Ferma à sapè s'è a sivera DNCG hà da autorizà in appellu u Sporting è Guillaume Gillet à trasfurmà u sonniu in rialità.
