Football (Ligue 1) - Festival du SC Bastia face à Lorient (4-1)
(A redazzioni d'Alta Frequenza)- Issu Vennari, u Sporting Club di Bastia s’hè disfattu assai facilmenti di Lorient nantu à a marca di 4-1. I Bastiacciu ani principiatu issu scontru à stronca chjavetta, aprindu a marca à a cinquesima minuta da un tiru da l’intrata di a surfazia di Boudebouz, assai bè servitu da Bruno. U Sporting hà staddatu una duminazioni zeppa di pettu à Britonni chì cunfirmani a so cattiva forma in issu principiu di staghjoni. Vicini à spissu da a gabbia avversa, i ghjucatori bastiacciu prusuvitoni a so pressioni prucacciendusi parechji uccasioni. È à a 22 a, dopu à un magnificu tiru nantu à a barra di u scatinatu Boudebouz, Khazri ricuparò u ballò in a surfazia pà fà si siccà da Gassama, uttinendu un rigori trasfurmatu d’una Panenka bedd’ardita . Ma à a 30a minuta, u tiru di Coutadeur, sviatu cù sfurtuna da Modesto, burlò à Landreau pà a riduzzioni di a marca di Lorient, i Britonni chì ritruvoni allora i so spiriti. Di ritornu da i vestitoghji, u Sporting appughjò di novu nantu à l’acceleratori u quali si cuncretisò da una cavalcata tonta di Krasic chì squassèo parechji difensori nanzi di inchjudì à Audard d’un zinzincu à a 58a. À a 79a nantu à un tiru di scornu di Boudebouz, Romaric aghjustò un quartu scopu d’una capata rabbiosa, u sunniacciu di Lorient prusigendusi cù a sclusioni d’Azouni à a 84a mentri chì i 13 000 sustenitori riuniti sottu l’acqua è u ventu in Furiani esultoni.
Stemi à senta à Frederic Hantz.
Sur le même sujet
