Football (Ligue 1) - François Modesto proche d'une signature avec le SC Bastia
(A redazzioni d'Alta Frequenza) - Frédéric Hantz, l'intrenori di u Sporting Club di Bastia, l'hà ditta nant'à i nostri ondi issu marti, quissu quì voli fà firmà trè ghjucadori in fin di cuntrattu è assai intarissati da u Sporting da quì à u 31 di maghju, ciò chì voli dì chì l'affari duvariani mova in furia s'è u club voli riescia issu scopu. Inde issa perspettiva quì, un primu ghjucadori si duvaria ingaghjà da quì à calchì ghjornu, è pudaria essa u difensori cintrali di l'Olympiakos, in Grecia, François Modesto. Natu in Bastia, duva ellu hè statu furmatu è hà principiatu ind'u mondu prufessiunali, quissu quì, chì t'avarà 35 anni iss'istati, hà avutu una carriera ricca. Prima in Cagliari, da u 1999 à u 2004 duva ellu hà avutu un bellu successu in Serie B eppo in Serie A, ma ancu in Monacu da u 2004 à u 2010 duva ellu hà sappiutu impona si com'è un ghjucadori di trinca è com'è capitanu, prima di cunnoscia l'Olympiakos duva ellu hà vintu trè volti u campiunatu di Grecia. A staghjoni scorsa dighjà, François Modesto hè statu vicinu d'ingaghjà si cù u Sporting, ma l'affari ùn fendu si micca cù u tempu finalmenti, avia prulungatu d'un annu in Grecia. Stavolta quì, u cartulari hè statu apartu più à lestra è si duvaria cuncretizà dunqua da quì à calchì ghjornu.
