Football (Ligue 1) - Frédéric Antonetti serait la priorité du SC Bastia
(A redazzioni d'Alta Frequenza) - Dipoi ssu marti, è a partenza u ghjornu nanzu di Claude Makéléké è di u so aghjuntu Didier Tholot, l'affari vani più in più in furia pà ciò chì tocca a ricerca di u novu intrenori di u SC Bastia. S'è i dirighjenti bastiacci cuncentrani i so sforzi annant'à trè coaches, una di ssi trè pussibilità cuminciaria à staccassi. Purtaria à un intrenori chì pudia essa ghjuntu d'istati, ma l'affari ùn s'hè micca fattu par via d'appuntamenti mancati è d'incumprensioni : si tratta di Frédéric Antonetti. Pà sustenidori numarosi o ancu usservatori, o forsa dinò pà membri di u cumitatu direttori, u prufilu di Frédéric Antonetti saria u meghju. Aldilà di una storia cumuna ricca è pusitiva cù u Sporting, l'intrenori natu in Vinzulasca pudaria essa l'omu chì ci voli. Cù una cumpitenza chì ni faci unu di l'intrenori francesi i più boni, Frédéric Antonetti hè dinò un omu di carattaru, calcosa chì faria prò à un effettivu induva certani mancani d'impegnu, di seriu, o di i dui. L'anzianu intrenori, par asempiu, di Saint Etienne, Nizza o Rennes hè vultatu dipoi u principiu di a sittimana in Bastia, un viaghju chì era privistu dipoi un pezzu ma chì si pudaria prulungà in furia, postu chì Pierre Marie Geronimi, u presidenti di u Sporting, avaria avutu una discussioni ssu marti cù Frédéric Antonetti. Quandu si sà chì i dirighjenti bastiacci sperani ch'elli vidarani u so novu intrenori dirighja i ghjucadori bastiacci à partasi di ssu ghjovi, a ghjurnata di ssu marcuri pudaria essa dicisiva.
Sur le même sujet
