Football (Ligue 1) - Frédéric Hantz n'a pas encore pris de décision quant à son avenir au SC Bastia
(A redazzioni d'Alta Frequenza) - Ssu marti, Pierre Marie Geronimi, u presidenti di u SC Bastia, è Frédéric Hantz, intrenori di u club, ani magnatu insemi pà parlà di l'avvena di ss'ultimu, in fin di cuntrattu à a fin di a staghjoni. Di ghjinnaghju, Frédéric Hantz avia prupostu d'essa prulungatu pà un annu in più cù a so squadra tennica, senza avè ricivutu risposta pusitiva. È duranti ssu ripastu, Pierre Marie Geronimi l'hà uffertu un cuntrattu di dui anni, ma cù cambiamenti ind'u so staff, vali à dì senza prulungà à Frédéric Née, unu di i so aghjunti, è u rimpiazzamentu di Didier Bouillot, priparatori fisicu. Un ripastu chì ùn s'hè micca compiu da a firmatura di un cuntrattu novu, ma ùn vali micca à dì ch'ellu si tratta di un "innò" difinitivu. Frédéric Hantz si dà in fatti u tempu pà rifletta, cù u so staff, pà risponda u 18 di maghju, à u più tardi, à u so presidenti.
Steti à senta l'intrenori bastiacciu, Frédéric Hantz.
