Football (Ligue 1) - Frédéric Hantz quitte le SC Bastia (officiel)
(A redazzioni d'Alta Frequenza) - Di più cà una paghjina chì si ghjira, hè un capitulu sanu chì si chjodi ind’u Sporting Club di Bastia, postu chì Frédéric Hantz, ghjuntu di maghju di u 2010, hà dicisu d’ùn prulungà micca a so storia annant’à u bancu bastiacciu. In fatti, quissu quì hà ricusatu a prulungazioni pruposta da i dirighjenti di u Sporting, di dui anni, ma senza rinnuvà unu di i so aghjunti, Frédéric Née, è rimpiazzendu u priparatori fisicu Didier Bouillot. Sò ssi cambiamenti dumandati ind’u staff chì ùn avia mai cambiatu dipoi ch’ellu hè ghjuntu ind’u club chì ani purtatu Frédéric Hantz à dì « basta ». Di fattu, ss’ultimu si ni và cù calcosa di sicuru : avè stampatu di manera prufonda u club è essa statu unu di l’intrenori i più boni di a so storia. In fatti, dopu avè ripresu un club in un statu pessimu è minacciatu di falà di modu amministrativu in CFA, quissu quì, cù i so ghjucadori è u travaghju di i dirighjenti bastiacci, l’hà fattu rinascia. In dui anni, u SC Bastia hè ricullatu da u Naziunali à a Liga 1, divintendu campionu di Naziunali è di Liga 2. Dopu, Frédéric Hantz hà stabilizatu u club in Liga 1, cù un mantenimentu abbastanza cunfurtevuli assicuratu a staghjoni scorsa à u dodicesimu postu, eppo ssa staghjoni cù a pussibilità di compia ind’i deci primi, è di rializà forsa a parfurmenza a più bona di u club in campiunatu dipoi u 2001. Oramai, i dirighjenti bastiacci duvarani truvà à lestra un rimpiazzanti di prima trinca à un intrenori chì avia assimilatu in furia tutti i particularità di u club è di tuttu ciò chì c’hè inghjiru, è chì hà da lacà un certu biotu in cori à i sustenidori bastiacci à partasi di sabbatu à ondeci ori menu deci di sera dopu à a so ultima partita contr’à u FC Nantes.
Steti à senta à Frédéric Hantz chì ci spiega i raghjoni di a so partenza.
Sur le même sujet
