Football (Ligue 1) - Ghislain Printant reste entraîneur du SC Bastia
(A redazzioni d'Alta Frequenza) - Certi pudariani dì "era ora", ma u cumitatu direttori di u SC Bastia hà sceltu di prulungà à Ghislain Printant annant'à u bancu di u SC Bastia. Dopu à calchì tempu pà rifletta, malgradu i risultati boni di Ghislain Printant dipoi a so numinazioni à u capu di a prima squadra di u Sporting, i novi azziunarii di u club ani dicisu di cuntinuà l'aventura fin'è u 2017. Ghislain Printant chì era in fin di cuntrattu in u 2016 fin'è tandu, hà da cuntinuà un travaghju principiatu calchì annu fà, postu ch'ellu hè ghjuntu ind'u club duranti l'istati di u 2010, mentri chì u Sporting avia mancatu di pocu a falata amministrativa in CFA è chì a furmazioni, settori induv'ellu era statu ingaghjatu com'è direttori, ùn era micca troppu in forma. Di nuvembri scorsu, u so tempu pruvisoriu com'è intrenori di a prima squadra era statu prulungatu in furia fin'è a fini di a staghjoni par via di i so metudi pà rialzà una squadra chì andava mali. Ferma à sapè cù chì effettivu u Sporting hà da parta torna, postu chì Aréola, Gillet è Sio duvariani vultà ind'i so clubs rispittivi, è chì ghjucadori com'è Diakité o Modesto pudariani parta in altrò. Un marcatu chì sarà difficiuli pà u Sporting, chì duvarà rimpiazzà ghjucadori maiò cù mezi limitati.
