Football (Ligue 1) - L'argentin Mauro Cetto (Palerme) vers l'AC Ajaccio
(A redazzioni d'Alta Frequenza) - À trè ghjorni di riceva u Parighji Saint-Germain, à u stadiu François Coty, l'AC Aiacciu hà guasgi compiu u so marcatu. Com'è l'emi ditta (veda altrò), Adrian Mutu duvaria pona i so valisgi ind'a cità Imperiali in principiu di settimana chì veni. In fatti, un cuntrattu di dui anni aspetta l'ecchisi star di Chelsea, l'Inter è di a Juventus. Ma i dirighjenti aiaccini si movini dinò da truvà u ghjucadori tantu aspittatu pà rinfurzà a difesa rossa è bianca. L'aiaccini pudariani rializà un altru bellu "colpu" inde issu settori, postu chì duvaria essa Mauro Cetto, l'Argentinu di Parlemu. À trenta anni, iss'ultimu hè statu campionu di i menu di 20 anni cù l'Argentina, nanzi d'andà in Francia è di cunnoscia parechji squadri com'è Nantes, Toulouse o Lille. Cù 270 partiti di Lega 1 ghjucati è una quindicina di scontri di cuppa d'Auropa, Mauro Cetto saria una ghjunta di prima trinca pà a squadra corsa. D'appressu à u presidenti Alanu Orsoni, duvaria essa impristatu da Parlermu à l'ACA, in principiu di settimana chì veni. Cù Mutu è Cetto, u marcatu saria dunqua compiu da u cantu di Timizzolu. Quattru à sei ghjucadori duvarani pà contu soiu parta da u club aiaccinu, forsa sottu à a forma d'imprestiti.
