Football (Ligue 1) - Le joueur du SC Bastia Brandao suspendu six mois
(A redazzioni d'Alta Frequenza) - Ssu ghjovi, a cumissioni di disciplina di a Liga di Ballò Prufiziunali hà ghjudicatu dui cartulari impurtanti pà u SC Bastia, quillu di l’incapata di Brandao contr’à Thiago Motta ind’i vestitoghji duranti a partita trà u Parighji Saint Germain è u Sporting u 16 d’aostu, è l’incidenti nanzi è dopu à u scontru Bastia – Marseghja di u 9 d’aostu. Ind’u prima cartulari, malgradu un avucata longa di u cunsighju di u ghjucadori, chì hà pruvatu tuttu pà dimustrà chì u gestu di u ghjucadori bresilianu, chì s’hè scusatu torna, ùn era micca statu pinsatu prima, a LFP ùn hà micca avutu u listessu parè è hà dicisu di suspenda Brandao duranti sei mesi, senza attimpera. A LFP hà dicisu dunqua d’essa assai sivera in ssu cartulari, postu chì ramintemi chì pà u paragonu, u ghjucadori di RC Lens Gabriel Cichero era statu suspesu solu pà cinqui mesi dui anni fà par avè minatu è feritu gravi un dirighjenti bastiacciu, mentri chì Thiago Motta hè statu appena feritu lighjeru è ch’ellu hà mancatu nisun scontru. A sanzioni di Brandao andarà fin’è u 22 di farraghju, a suspensioni partendu da u mumentu di a so suspensioni cunservatoria à a fin d’aostu. L’avvena di u bresilianu cù a maglia turchina hè dunqua cumprumessu, i dirighjenti bastiacci ùn sò ancu à decida ciò ch’elli farani, una suspensioni in più pudendu intarvena torna ind’u casu chì Brandao, chì duvaria essa ghjudicatu da quì à pocu da u Tribunali Currizziunali di Parighji, saria cundannatu à un’interdizzioni di stadiu. Ind’u cartulari SC Bastia – Marseghja, l’avucata di u direttori di l’urganisazioni è di a securità Antoine Agostini è i pezzi ch’ellu hà arricatu in u cartulari ani cunvintu a cumissioni di disciplina chì hà cundannatu u club solu à un’amenda di 3 500 auri, un menu mali di pettu à i fatti rimpruvarati à principiu.
Sur le même sujet
