Football (Ligue 1) - Le point sur les transferts au SC Bastia
(A redazzioni d'Alta Frequenza) - Mentri ch'ella ripighjarà a Liga 1 da quì à una piccula quindecina di ghjorni, u SC Bastia cerca sempri à rinfurzà u so effettivu, stavolta cù ghjucadori di rinonima. Pà l'attaccu, Brandao, u bresilianu di 34 anni hè vultatu ssa dumenica in Saint Etienne dopu avè visitatu i stallazioni di u Sporting è essa si intrattinutu cù i dirighjenti di u club. Li piaci u prughjettu bastiacciu ma dinò u cuntrattu di dui anni chì l'aspittaria, ma quissu quì si ni voli andà da Saint Etienne cù un sceccu malgradu tuttu, ancu s'è u club di u Forez hè prontu à lacà lu parta gratisi, ancu puru s'ellu li ferma un annu di cuntrattu. Malgradu tuttu, a dicisioni duvaria intarvena in furia è saria pusitiva postu chì Brandao è Saint Etienne avariani trovu un accordu à ssu nivellu quì. In difesa cintrali, a pussibilità di veda sbarcà l'argentinu di 31 anni Renato Civelli, chì ghjoca in ssu mumentu in Turchia in Bursaspor hè di più in più forti dipoi a fin di a sittimana. Ma a so ghjunta, chì pudaria essa senza indennità di trasferimentu par via di i difficultà finanziari di u club turcu, si pudaria fà solu s'ellu si ni và Djibril Cissé, l'attaccanti internaziunali francesi è u Sporting ùn hà micca trovu accordu finanziariu par avà pà una partenza chì pari guasgi sicura, postu chì Cissé ùn pò più ghjucà à l'altu nivellu.
