Football (Ligue 1) - Le point sur les transferts au SC Bastia
(A redazzioni d'Alta Frequenza) - Pà ssu principiu di sittimana, l'affari movini à u SC Bastia. S'è u cartulari Brandao ùn hè ancu chjosu di manera ufficiali, tuttu pari firmà pusitivu. Malgradu tuttu, l'incertezza hè di più in più forti pà ciò chì tocca a participazioni di u bresilianu à u scontru contr'à Marseghja par via di raghjoni amministrativi. À partasi di ssu marti, un antru ghjucadori hà da ghjunghja pà essa pruvatu, u mezu uffensivu internaziunali colombianu di 27 anni Juan Pablo Pino, libaru dopu a fin di u so cuntrattu cù l'Olympiakos, è un imprestitu ss'ultimi mesi à l'Independente Medellín. Cunnosci u campiunatu di Francia par avè ghjucatu in Monacu trà u 2007 è u 2010. Un'infurmazioni cunfirmata da u presidenti bastiacciu Pierre Marie Geronimi annant'à u situ internet di u club, com'è un'antra pussibilità chì s'assumiglia di più à u cumplementu in attaccu postu chi un antru colombianu, Joao Rodriguez, 18 anni, pudaria essa impristatu da Chelsea, un affari chì saria statu resu più faciuli da i rilazioni di Claude Makélélé, l'intrenori bastiacciu chì hà ghjucatu duranti parechji anni pà u club inglesi. Infini, à u nivellu di i partenzi, u mezu uffensivu mauritanianu Adama Ba hè statu impristatu pà una staghjoni senza uzzioni par essa cumpratu à i Chamois Niortais chì ghjocani in Liga 2.
