Football (Ligue 1) - Le SC Bastia à la relance face au Toulouse FC
(A redazzioni d'Alta Frequenza) - Dopu à dui ghjurnati micca famosi, u SC Bastia hà da pruvà à rilanciassi contr'à u Toulouse FC pà ssa terza ghjurnata di Liga 1. In fatti, pà rassicurà appena tuttu u mondu, è elli stessi prima di tuttu, i ghjucadori bastiacci duvarani andà à circà a vittoria contr'à una squadra di più di u so nivellu. Ci vularà à firmà attenti malgradu tuttu contr'à una furmazioni di Toulouse chì ùn hè tantu cambiata à u nivellu di i so ghjucadori è di a tattica ss'ultimi staghjoni. Una stabilità chì s'upponi à un Sporting chì cunnosci una ristrutturazioni difficiuli, cù feriti com'è quilla di Cahuzac, o suspensioni à longu andà, com'è pà Brandao chì risica una sintenza ancu più forti davanti u tribunali currizziunali pà viulenzi vulintari cù premeditazioni nentru à un locu spurtivu contr'à u ghjucadori di u PSG Thiago Motta cà davanti a cumissioni di disciplina. Pà ssa partita, omi di basa com'è Squillaci o Diakité ùn sò più feriti è voltani da l'infirmeria, mentri chì Juan Pablo Pino, di quali ùn si sà nulla cuncirnendu a so cundizioni fisica, hè a piccula surpresa di u gruppu bastiacciu ritinutu da l'intrenori di u Sporting Claude Makélélé.
U stemi à senta.
Sur le même sujet
