Football (Ligue 1) - Le SC Bastia boit la tasse à Reims (2-4)
(A redazzioni d'Alta Frequenza) - Pà a dodicesima ghjurnata di Lega 1, u SC Bastia hà persu torna fora di i so lochi 4-2 in Reims. Dopu à vinti primi minuti bè ammaistrati, i lucali ani scrittu una prima reta cù De Préville contr'à u corsu di u ghjocu, pighjendu di cortu a difesa à a 24a minuta. È à partasi di ssa reta quì, Reims hà ripresa a suprana nant'à ssa partita par tena la fin'è a fini. À a 44a, u Sporting hà cuncessu un penalty dopu à un spaziu larghissimu lacatu nant'à u latu dirittu di a difesa à Ayité, presu da un ritornu vanu di Sablé, penalty trasfurmatu da Krychowiak. È mentri chì dui minuti dopu à u principiu di u sicondu tempu, Romaric hà datu torna appena di spiranza battendu à Agassa cù un'incapata nant'à un corner, trè minuti dopu, par via di un sbagliu di quilli trà Squillaci è Landreau, Oniangué hà missu un stucciu traputenti è mandava à caternu i speri di u Sporting. Troppu impricisu pà spirà calcosa di meghju, u Sporting s'hè annigatu ancu di più cù una reta d'Atar à l'81a minura contr'à una difesa smubilizata. U ghjuvellu di Khazri nant'à una penalità da luntanu à a fini hà riduttu solu i disguasti à u goal average, u Sporting rinculendu à u tredicesimu postu cù setti punti di più di pettu à a zona rossa.
Steti à senta l'intrenori bastiacciu, Frédéric Hantz.
Sur le même sujet
