Football (Ligue 1) - Le SC Bastia communique suite à l'article du Parisien
(A redazzioni d'Alta Frequenza) - Dopu à l'articulu di u ghjurnali Le Parisien nant'à una falata amministrativa pussibuli di u SC Bastia in Liga 2, u club hà riagitu in un cumunicatu. Dici par asempiu chì "u club hè surpresu chì affirmazioni simuli pudissini essa publicati in a stampa naziunali, mentri chì a staghjoni ùn hè ancu à compia cù 2 ghjurnati di campiunatu torna, chì poni avè cunsiquenzi impurtanti nant'à i risultati finanziari di i clubs di l'elita" è ùn pò "accittà chì sciffri scemi nant'à debbiti diversi, ghjunghjendu da una fonti "autorizata" d'ùn si sà, pudissini essa lampati cusì in publicu. Nisun club seriu ùn pudaria sopraviva di manera raghjunevuli à cortu andà cù 12 millioni d'auri ch'elli si duvariani à l'URSSAF!" U club annunzia ch'ellu hà da cumunicà di manera publica da quì à calchì simana è cù una trasparenza tutali nant'à u statu esattu di i so conti, in un previsiunali stabilitu à u 30 di ghjunghju di u 2016. Ssu previsiunali sarà quillu prisintatu dopu à a DNCG duranti u famosu passaghju di u mesi di ghjunghju". Cuncirnendu u cartulari di a DNCG amintatu da Le Parisien, u club spiega chì "dopu u passaghju di u mesi di ghjinnaghju di u 2016, quandu chì u club hà fattu l'ughjettu di nisun misura di falata, a DNCG hà dumandatu dopu in una lettara di u 1a di marzu di u 2016 a cumunicazioni d'elementi di cuntabilità. U nostru club s'hè ingaghjatu à cumunicà ssi ducumenti duranti u passaghju di a fini di a staghjoni. Ss'ingaghjamentu sarà rispittatu da quì à calchì simana, com'è tutti l'altri ingaghjamenti presi d'altrondi di lugliu di u 2015 davanti à ss'istanza quì".
Sur le même sujet
