Football (Ligue 1) - Le SC Bastia dévisse face à Lyon (1-3)
(A redazzioni d'Alta Frequenza) - Pà a 17a ghjurnata di Lega 1, u SC Bastia hà persu pà a prima volta di a staghjoni in casa soia 3-1 contr'à Liò. Ind'u prima tempu, i bastiacci ani piuttostu duminatu ssa partita, avendu l'uccasioni i più impurtanti contr'à visitori micca famosi ind'u ghjocu. À rombu d'attaccà, u Sporting hè riisciutu à scriva una reta à a 34a minuta, quandu Palmieri hà fattu un centru ripresu cù un'incapata da Raspentino. Dopu à un prima tempu cusì bonu, u Sporting paria essa bè lanciatu, ma dopu à a pausa, u Sporting hà cappiatu daveru, pirdendu u so ghjocu è fendu si mova da Liò. À a 53a, nant'à un sbagliu tamantu di a difesa, Lacazette s'hè ritrovu solu contr'à Landreau ch'ellu hà crucificatu pà l'egualisazioni. Trè minuti dopu, un sbagliu difensivu novu hà lacatu a pussibilità à Liò d'avè un centru chì hà trovu u capu di Benzia chì hà scrittu una reta pà i soi. A sulidità è a sirenità sò passati da l'altra parti in deci minuti, u Sporting straziendu pà riagiscia dopu à ssu cambiamentu di situazioni, ghjunghjendu di manera più scarsa in di diciottu metri di Liò. I bastiacci pruvavani à andà di fronti, ma in vanu postu chì a ghjustezza ùn c'era micca duranti ssu sicondu tempu. À l'85a, Gomis hà cacciatu l'ultima spiranza bastiaccia battendu à Landreau. Bastia chì hà straziatu fin'è a fini cù a sclusioni di Cahuzac dopu à una siconda carta gialla à l'88a. À a classifica, u Sporting rincula à u dodicesimu postu, sempri cù 23 punti.
Steti à senta l'intrenori bastiacciu, Frédéric Hantz.
