Football (Ligue 1) - Le SC Bastia doit se relancer contre le FC Lorient
(A redazzioni d'Alta Frequenza) - Stasera (sabbatu) à 8 ori à u Stadiu Armand Cesari, u Sporting Club di Bastia, diciasettesimu, hà da riceva u FC Lorient,dicesimu, ind'u quadru di a 14a ghjurnata di Lega 1. Hè urghjenti di buscà si un bon risultatu da u cantu bastiacciu, quissi quì essendu vicini à a zona di rilegazioni è pudendu falà ci in casu di disfatta o ancu di scontru à paru di pettu à i risultati di l'altri squadri. Da u cantu brittonu, malgradu l'assenti à parechji, soprattuttu in difesa, sarà una squadra difficiuli à disturbà pà u Sporting postu ch'ella t'hà parechji elementi di prima trinca ind'u settori uffensivu, ciò chì ghjustificheghja u so quatriesimu postu à a classifica di l'attacchi. Altra difficultà pussibuli, u tarrenu. Quissu quì, cambiatu calchì ghjornu fà, hè dighjà di una qualità micca strasurdinaria, tuttu un pezzu da u cantu di a tribuna à meziornu essendu assai grassu par via di una mancanza di soli, piattu da u tettu di a tribuna. Pà ciò chì tocca à u gruppu, s'è Cahuzac è Marque, suspesi, è chì Vannucci è Koné sortini, Choplin, Mary, Yatabaré è Palmieri voltani.
On écoute l'entraîneur bastiais, Frédéric Hantz.
