Football (Ligue 1) - Le SC Bastia étrille Brest (4-0)
(A redazzioni d'Alta Frequenza) - U Sporting Club di Bastia hà stirpatu u Stade Brestois 4-0 ind'una partita chì avvicina assai u Sporting da u so mantenimentu. À u principiu, u Sporting t'avia dighjà a suprana nant'à brittoni pocu appiecati è micca precisi inde u so ghjocu, com'è diranghjati da a prissioni inghjiru à elli. U Sporting ùn ci la facia micca malgradu tuttu à batta una difesa di Brest bè in piazza, è chì avaria pussutu incascià una reta appena nanzu à a mez'ora nant'à una di l'uccasioni scarsi di i brittoni. Ma Khazri, intrutu dopu à a ferita di Maoulida, hà rigalatu un ghjuvellu à Furiani à a 40a minuta cù una reta nant'à una penalità diretta da luntanu. Ind'u sicondu tempu, i ghjucadori di Brest sò vultati nant'à u tarrenu sempri cù un certu timori, è a sanzioni ùn si hè micca fatta aspittà quandu nant'à un centru tiru di Rothen, Thauvin ripighjava u ballò pà u 2-0, à a 49a minuta. Calchì minuta dopu, Brest cù Ayité hà mancatu una grossa uccasioni, è chì hà cappiatu daveru subbitu dopu. Prima à a 70a minuta, quandu Thauvin, bè sirvutu da Modeste inde l'ultima zona, hà scrittu a terza reta. Ottu minuti dopu, a sirata divintò un scempiu pà i brittoni cù a sclusioni di u so guardianu dopu à una falta nant'à Modeste, eppo un penalty trasfurmatu à a seguita di què dinò cù Modeste. Stasera, dopu à una partita scema, è cù novi punti in più di pettu à a zona rossa è setti ghjurnati chì fermani, u Sporting Club di Bastia ùn hè mai statu cusì vicinu di validà u so ticchettu pà un antru annu in Lega 1.
Ecoutez l'entraîneur bastiais, Frédéric Hantz.
Sur le même sujet
