Football (Ligue 1) - Le SC Bastia face au Stade Brestois pour se rapprocher du maintien
(A redazzioni d'Alta Frequenza) - Stasera (sabbatu) à 8 ori à u stadiu Armand Cesari, u Sporting Club di Bastia, 13u di u campiunatu di Lega 1, hà da riceva u Stade Brestois, 18u è prima squadra ind'a zona rossa pà a 31a ghjurnata. Dui squadri chì ùn sò mancu appena nant'à a listessa dinamica. Da un cantu, u Sporting hà presu deci punti nant'à quindici durant i cinqui ultimi partiti, è ferma nant'à ottu reti scritti in dui scontri dopu à successi di trinca contr'à Liò è Valenciennes. In casu di vittoria contr'à i brittoni, u Sporting t'avarà à u minimu novi punti in più di pettu à a prima furmazioni ind'a zona di rilegazioni. Da l'altru, u Stade Brestois hà presu solu un puntu in cinqui partiti, ma ferma soprattuttu nant'à una settimana chì s'assumighja à una seria americana di u dopu meziornu. Luni, Landry Chauvin hè statu smessu da i so funzioni d'intrenori pà essa rimpiazzatu da u direttori spurtivu di u club Corentin Martins, tuttu què cù uffesi publichi viulenti calchì volta trà u presidenti è u vici presidenti di u club, iss'ultimu essendu in cunflittu apartu è publicu cù u so intrenori rimpiazzanti. Ind'u gruppu bastiacciu, Cahuzac, chì ùn hè più feritu à a spalla, hà fattu a scelta di ùn vultà micca ind'u gruppu pà issa partita, mentri chì Khazri è Rothen voltani, u primu dopu à una ferita è u sicondu di pettu à a fin di a so suspensioni.
On écoute Frédéric Hantz.
Sur le même sujet
