Football (Ligue 1) - Le SC Bastia ferme la tribune Est d'Armand-Cesari jusqu'à nouvel ordre
(A redazzioni d'Alta Frequenza) - In un cumunicatu, u SC Bastia annunzia una seria di dicisioni dopu à l'incidenti di a partita di dumenica contr'à Liò. U club hà dicisu di sarrà di manera cunservatoria a tribuna Est di u stadiu Armand Cesari, da induva sò accaduti i primi incidenti, è di rializà u so accunciamentu novu. In più di què, tutti i parsoni chì ani participatu à l'incidenti è chì sarani identificati sarani difesi d'andà à u stadiu da u club pà a durata a più alta privista da i testi di legi chì parmettini dipoi calchì mesi à i clubs di pruibiscia à i spettatori di ghjunghja à u stadiu. Infini, u club hà postu una lagnanza contr'à X è s'hè custituitu partita civili. In ssu cumunicatu, hè pricisatu infini chì "u Sporting Club di Bastia è a maghjurità a più maiò di i so sustenidori ricusani d'essa presi in ustagiu da una minurità di parsoni è s'ani da batta pà tena i valori di u club è a piazza chì hè a soia inde l'elita". Ssi dicisioni parmittarani o micca à u club d'addulcì a timpesta disciplinaria chì s'annunzia in a LFP ? A risposta sarà cunnisciuta ghjovi à sera.
