Football (Ligue 1) - Le SC Bastia finit par rompre face à Monaco (1-3)
(A redazzioni d'Alta Frequenza) - Hè dopu à una partita aparta chì u SC Bastia hà persu di manera logica 3-1 contr'à l'AS Monacu. U prima tempu hà cuminciatu propiu mali pà u Sporting, chì à a quattriesima minuta pirdia dighjà par via un errori di a difesa chì hà apprufittatu à Ferreira Carrasco. Senza cappià malgradu tuttu, u Sporting era uffensivu cù una bella vulintà ma senza essa periculosu pà daveru. Ancu di grazia, à a 22ima minuta, ss'energia hà purtatu i so frutti quandu Maboulou, assai bè sirvutu da Kamano, hà battutu à Subasic cù un'incapata maravigliosa. Missu in periculu da i contri di Monacu, i bastiacci erani sempri prisenti à l'attaccu quantunqua. Dopu à a pausa, a fisiunumia di u scontru era listessa, cù u periculu da i dui canti, ancu s'è l'uccasioni di i visitori erani più putenti. A partita s'apria di più in più senza fà cambià u risultatu, l'attacchi essendu di più in più numarosi ma micca abbastanza pricisi. Ed hè annant'à una penalità da luntanu chì Monacu hè passatu davanti, Kondogbia mandendu u ballò cù un'incapata ind'i gabbii d'Areola à a 78ima. I bastiacci ani pruvatu à riasgiscia ma in vanu, postu ch'elli ani incasciatu una terza rialisazioni à l'85ima di Ferreira Carrasco, u Sporting essendu torna ind'a zona rossa dopu à ssa partita.
Steti à senta à Claude Makélélé, l'intrenori bastiacciu.
Sur le même sujet
